Angelina Cristy

Penulis : Paman Es Doger Buntok

Buntok, penanews.net Kalimantan Tengah- Musim hujan, paling dikatujui oleh panganten hanyar. Namun, bagi pedagang es keliling kaya aku, banyak libur. Ya, anggap lah sambil mambujuri urat tulang. Oleh bila musim panas bahimat bacari, kada bapaparaian.

Samingguan sudah, bila baisukan pasti hujan, maka sampai tangah ari kada baampihan.

Ku gasak ai bajualan, barang haja baulah sadikit, tahan gasan bawilanja. Dari pada tapakai tarus duit tabungan.

Rancana handak mamalar, sakalinya tulus jua ai, hujan kada baampihan. Biar gerimis tipis tapi, matan baisukan sampai kamarian.

‘Pasrah haja sudah, kubawa bulik haja. Kalo isuk kah, ari panas manjantang’ dalam hatiku gagarunum. Hari sudah kamarian, aku bacapat handak bulik. Oleh kulihat ari Pina mangadap, takutan jua kalo jimus kahujanan.

Sambil tarus maninjak, aku mahantas gang halus. Maliwati komplek kuburan. Rahatan asik maninjak. Ada urang bahiau matan balakang.

“Man, paman. Es man.” Suara binian bakuriak matan jauh daerah pamakaman. Kuitihi ai kabalakang. Langsung ai kudatangi.

Bau harum kambang kananga mandingur mancucuk hidung, pas aku mamaraki bibinian nitu. Padahal di kiri kanan Kadada puhunnya.

Sabujurnya aku asa bingung jua, kanapa ari basanjaan ada bibinian di padang kuburan, tapi nang ngaran handak duit, ayu ai.

Aku sudah sampai parak inya, tapi inya mambalakangiku. Kaya ada nang dilihatnya ka arah kuburan nang hanyar di tabuk, balum di isi lagi.

Amun dari pakaiannya, kaya urang bagawi di Bank. Awaknya tinggi, rambutnya maurai panjang, roknya di atas lintuhut. Asa baliuran aku maitihi, tapi kaingatan bini anak di rumah, ku alih pikiranku.

“Barapa galas pian handak? Di bungkus atawa makan sini kah?” Napa kah aku asa gugup bapandir awan inya, bulu awak cagatan, mandisap-disap. Kaya bahari pamulaan handak nembak binian, sama kada balain. Sampai paluh dingin kaluar, akhirnya di tolaknya jua, maaf lah curhat Sadikit.

Lalu ai inya bapaling mahadap aku, jantung ku asa pacul takajut, oleh dasar bungas urangnya. Pokoknya 19 ikung mantanku kadada nang bungas kaya inya.

“Anu akan sagelas ja, Paman ai. Langsung makan sini,” kadada ekspresi lalu muhanya, tapi tatap ai bungas palihat ku.

“Maapa pian disini surangan? Ari handak hujan nih,” sambil kukurihingi, tapi inya kada mambalas.

“Malihat urang manabuk kubur tadi paman ai,” jawabnya lagi, tapi tatap kadada ekspresi jua muhanya.

“Oooh” sambil kuitihi kiri kanan kalo ada kawannya nang lain, sakalinya kadada jua. Pikiranku, mungkin itu lubang kubur kaluarganya. Ya, disini kalo orang meninggal tiga hari hanyar di kubur. Selain muslim. Ada jua nang tujuh hari.

Imbah ku ulahakan es pesanannya, Guntur wan papatirnya, gadaguman, asa diatas kupala. Angin sing darasan, di iringi hujan turun bagamat, tapi ganal-ganal.

Aku badadas mamaling garubak, kada tahan jua mun kahujanan, bisa mariap dingin awak. Sampat kuitihi tulisan ngaran di dadanya kirinya batulisan (Angelina Cristy) oh, pantas ngaran wan urangnya bungas.

Sudah 50 meter aku maninggalkan bibinian bungas tadi, hanyar ingat pada inya balum bayar. Kuitihi kabalakang, kadada lagi. Mungkin inya mancari wadah banaung pikirku. Balaju ai jua maninjak, hujan makin balabat.

***

Esoknya aku datangi lagi ka Padang kuburan nitu. Imbah tangah hari sakitar jam satuan.
Pas banar harinya panas, dasar rami jua ai urang nukaran es Doger paman. Oleh kadada orang lain bajualan disitu, aku haja.

Wiw! Wiw! Wiw!

ambulan datang, diiringi urang banyak bajurut-jurut lakian bibinian, kabanyakan buhan baju dinas kulihat.

Harinya makin panas, makin rami bajualan, kada kasimbahan pang. Lagi asik malayani urang batukaran, aku takajut, ada rombongan nang mambawa kambang ucapan duka cita batulisan ngaran (Angelina Cristy) wan fotonya jua.

Aku manarik hinak panjang, kada kawa baucap napa-napa lagi, kada marasa lagi. Timbul kadap palihat.

***
Imbah aku sadar, aku sudah di rumah. Jar biniku, tadi aku pingsan rahatan malayani urang batukaran.

“Pian nih, mun awak asa kada tapi nyaman, jangan di paksa bagawi yank ai. Untung pian pingsan padang urang, banyak haja nang manulung,” ujar biniku nang duduk di higaku sambil manyurung banyu teh panas.

Aku masih mandam kada kawa bapandir, berarti nang kujuali sumalam rahatan Ari Sanja tu? Ah, sudah gin. Biar haja harga es sagalas lima ribu nitu ku bari akan.

Red: Al’fakir Gusman (Akang)

Tinggalkan Balasan

Alamat email Anda tidak akan dipublikasikan. Ruas yang wajib ditandai *